Përfshirja e Manastirit të Deçanit nga organizata Europa Nostra si “monument në rrezik”, ka nxitur reagime të shumta.

Kryetari i Komunës së Deçanit, Bashkim Ramosaj, thotë se s’ka asnjë rrezik derisa mendon se deri te ky vlerësim ka ardhur si pasojë e mashtrimit nga ana e punëtorëve të Manastirit dhe qeverisë së Serbisë.

“Ky relacion është krijuar mbi fakte të pavërteta. Mbi këto fakte është dashur të pyeten institucionet që e kanë në kompetencë ruajtjen e Manastirit si KFORI dhe vlerësimi i tyre është pozitiv”, tha Ramosaj për KTV’në.

“Vlerësimi i tillë ka ardhur si pasojë e mashtrimit dhe viktimizimit të personelit të Manastirit që ka ndikim edhe qeveria e Serbisë në këtë aspekt”, shtoi ai.
“Duhet të bëhet një prerje e situatës. Shqiptarët në Deçan dhe Kosovë tashmë e kanë dëshmuar që janë njerëz me objektive paqësore dhe kanë dëshmuar që s’kanë asgjë kundër Manastirit në Deçan dhe objekteve tjera ortodokse”, theksoi ai.

“Prej vitit 2005 e deri në ditën që po flasim asnjë incident nuk është shkaktuar në drejtim të Manastirit dhe kjo nuk ka ndodhur as historikisht. Manastiri i Deçanit është vlerësuar se është ndërtuar nga vetë shqiptarët e Deçanit dhe është ruajt nga vetë shqiptarët e Deçanit deri në ditët e sotme”, shtoi ai.